Ficobak adimen artifizialean oinarritutako tresna bat garatu du azoketako parte hartzea aurreikusteko
FerIA deitzen da tresna berria, eta erakusketarien parte hartzea nahiz bisitariena iragartzera iritsi daiteke, fidagarritasun maila altuarekin.
Ficoba, kanpotik. FerIA adimen artifizialean oinarritutako tresna garatu duela iragarri du Ficobak. Tresna berri horren helburua azoken parte hartzea aurreikustea izango da, bai erakusketarien baita bisitarien partetik ere. Bi parametro horiek azokaren sektorean eragin zuzena dutela adierazi du erakustazokak: “Lehenengoak
segurtasunarekin, aparkalekuarekin, edukierarekin eta abarrekin lotutako prozesuen plangintza errazten du. Bigarrenak, berriz, merkataritza lana optimizatzea ahalbidetzen du, baliabideak modu eraginkorragoan banatzen”.
Erakusketarien aurreikuspena egiteko datu historikoetatik abiatu da Ficoba, eta horri azokaren parte hartzea iragartzeko sistema bat gehitu zaio, neurosare bat entrenatuz. Erakustazokaren esanetan, erakusketarien parte hartzearen iragarpenak %87ko fidagarritasuna du. Ohiko inkestek %30 gutxiagoko fidagarritasuna zuten.
Bisitariak aurreikusteko sistema garatzeko, berriz, sare neuronal errekurrenteak erabili dituela jakinarazi du Ficobak, eta horiek testuinguruko datuekin hornitu dituztela, data, klima eta bestelako elementuak. Fidagarritasunari dagokionez, %79ko emaitzak lortu dituela azaldu du.
Hemendik aurrera, tresna garatzen jarraituko duela adierazi du Ficobak, besteak beste, ekitaldi baten arrakasta aurreikusteko, hainbat parametro kontuan hartuta: ekitaldi mota, bisitari kopurua, erakusketari kopurua… Horrez gain, lehen fasea amaituta, asmoa du software hori kanpoko eragileei aurkezteko.
Ficobaren digitalizazioaren barruan kokatzen da ekintza hori.
