Mikel Sarriegiren 'Brianen bizitza' antzezlana larunbatean, Itsas Etxean
Zurriola Antzerki Eskolaren antzezlana ikusteko aukera izango da larunbatean; edukiera eguneratuaren arabera, 81 lagun sartu ahal izango dira emanaldira.
Mikel Sarriegi zuzendari hondarribiarraren Brianen bizitza antzezlana ikusteko aukera izango dute interesdunek hilaren 8an, Itsas Etxea Auditoriumean, 19:00etan. Edukiera eguneratu ondoren, Hondarribiko Udalak jakinarazi du 81 lagunentzako edukiera izango duela emanaldiak. Sarrerak ohiko bideetan eskura daitezke.
Ondokoa da sinopsia:
“Nazareteko Jesusen garaian gaude. Brian erromatarren okupazioaren aurka dagoen gazte idealista bat da. Hauen aurka egiteko Judeako fronte herrikoia erromatarren aurka borrokatzen duen taldean sartuko da, eta bere matxinada partikularra hasiko du. Bere lehenengo ekintza iraultzailean atxilotu egingo dute eta Poncio Pilatos gobernadore erromatarraren eskuetan eroriko da. Ihes egin eta gero, Mesiatzat hartuko dute eta… beno, hobe izango da antzezlana ikustea, Monty Phyton zuzendarien zentzugabeko umorearekin egindako antzezlan zoragarri hau. Eta ez ahaztu, bizitzaren alde ona begiratu beti!”
