Ospitaleko lanek hiru baldintza bete behar dituztela azaldu du EH Bilduk
Osasun sistema publikoa antolatzeko bere osotasunean hartu behar dela sistema, eta lehen arretaren garrantzia nabarmendu du eskualdeko koalizioak.
Bidasoko EH Bilduk adierazpenak egin ditu Bidasoa ospitalean egin nahi dituzten obren inguruan. Etxeko egoeraz gain, EAEko osasun sistema publikoaren egoerak “kezkatu” egiten diela eta sistema honek okerrera egin duela azaldu dute ere.
Bat egiten dute Bidasoa ospitaleko ebakuntza gelek hobekuntza behar dutela, baina obra horiek funtsezko hiru baldintza bete behar dituztela uste dute: “Herritarrei ematen zaien zerbitzuaren kalitatean eraginik ez izatea, sortuko diren eraginak langileekin adostea eta eskualdeko osasun laguntza guztia hobetzeko plan baten barruan egotea, lehen mailako arreta hobetzeko beharra azpimarratuz eta espezializatua eta ospitalekoa ahaztu gabe”.
Lehen mailako arreta “egoera tamalgarrian” dagoela diote “politika negargarrien ondorioz”, zehaztu dute. Osasun sistema publikoa antolatzeko bere osotasunean hartu behar dela eta erabilitako politikek ez dutela lehen arretaren garrantzia “ondo baloratu ezta aintzat hartu” , diote.
Xehetasunak argitzeko asmoz, ospitalean egin nahi denari buruzko informazio zehatza eskatu dute, bai aurreikusten duten azpiegiturari berriari buruz, bai osasun mailan planifikatzen den guztiaren inguruan.
