Hego ingurabideko lehen faseko lanak amaituta, errepidea irekiko dute hurrengo astean
Orain bigarren faseari ekingo diote, Tokiko Gobernu Batzarrak 119.967,87 euroko aurrekontua onartu eta gero.
Oinaurre eta Txenperenea elkartzen dituen hego ingurabidearen lehenengo faseko zatia abenduaren 2an irekiko dute ibilgailuentzat. Orotara hiru zirkulazio errei sortu dituzte, eta proiektuaren barruan, Txenperenea eta Euskal Herria hiribidea ere lotu dituzte.
Hasieran, lehenengo fase honetako lanak burutzeko 7.048.544,04 euroko aurrekontua zegoen onartuta, baina gerora aldundiak 6 milioi euro inguruko ekarpena egin zuela azaldu du udalak. Aipatu bezala, Txenperenea eta Euskal Herria hiribidea elkartu dituztenez ere, udal funtsetako dirua erabiliz aurrekontuari 1.167.151,77 euro gehitu zizkioten ere.
Proiektu hau GI-636 errepidetik hiriaren sarbidea hobetzeko garatu zutela oroitu du udalak, eta horretarako aldundiarekin akordio bat egin zutela. Lanen kudeaketa, lizitazioa eta kontratazioa Irungo Udalaren ardura izan da, eta finantzaketa, aldiz, udalaren eta Foru Aldundiarena.
Mugikortasun eta zirkulazio arloan azken urteetan egin duten proiektu nagusia dela amaitu berri dutena esan du Jose Antonio Santano alkateak: “Hiriak aspaldidanik espero zuen jarduketa bat”. Lehen fasea amaituta, beste erabaki batzuk pentsatzen joan daitezkeela gaineratu du, beti ere hirian mugikortasun iraunkorra sustatzeko sortu duten planaren baitan.
Orain bigarren faseari ekingo diote, hala baieztatu du udalak Tokiko Gobernu Batzarrak bigarren faseko eraikuntza lanak egiteko proiektua idazteko kontratua onartu ostean. Guztira, 119.967,87 euroko aurrekontua onartu dute “aukerak aztertzeko eta eraikuntza proiektua osatzeko”.
