'Bake eta biolentziaren hondarrak' trilogia Irunen hasiko da
ETAk jarduera armatua utzi zuenetik 10 urte pasa direla eta, Proyecto 43-2 konpainiaren antzezlana ikusteko aukera izango da hiru egunetan.
'Bake eta biolentziaren hondarrak' trilogiaren aurkezpena. Aieteko Konferentziaren 10. urteurrena bete berri da, eta asteazkenean, ETAk jarduera armatua utzi zuela beste 10 urte beteko dira. Urteurren horren testuinguruan Gipuzkoako Foru Aldundiaren eskutik, Irun, Eibar eta Donostian Bake eta biolentziaren hondarrak trilogia eskainiko dute. Irunen hasiko da bira aste honetan, bihartik ostegunera bitartean, Amaia KZn.
Hiru ikuskizunek osatzen dute trilogia —gaztelaniaz izango da—: 43-2 proiektua, Bestearen begirada, Gauaren bukaerara bidaia. Goizean ikastetxeetako ikasleak hurbilduko Amaia KZra, eta arratsaldean, publikoari zabalduko zaio.
Proyecto 43-2 konpainiaren egitasmo horrek antzerkia eta dokumentala uztartzen ditu, eta horrekin batera, emanaldiaren bukaeran, protagonistak entzuteko aukera izango da. Bihar, Luis Azpiolea, Jesus Egiguren eta Maria San Miguel obraren zuzendariak parte hartuko dute; asteazkenean, San Miguelekin batera Maixabel Lasa eta Gorka Landaburu entzuteko aukera izango da, eta ostegunean, Naiara Zamarreño eta Ivan Ramos.
Trilogia
Trilogiako lehen atala 2012an estreinatu zen, 43-2 proiektua. Bertan, bost lagunek hartuko dute hitza, eta bakoitzak errealitatearen bere ikuspegia emanez, aitaren hilketaren hamargarren urteurrenaren eta familiak bere txokoan antolatzen duen afari baten testuinguruan. Bestearen begirada, berriz, 2015eko da, Langraiz bidea eraman zuten presoen eta biktimen arteko elkarrizketan oinarritutakoa. Gauaren bukaerara bidaia, berriz, 2017ko azaroan estreinatu zuten. Bertan, Euskal Herriaren orainari eta indarkeriaren seme-alabek indarkeriak berak utzi duen ondarearekin bizitzen nola ikasi behar duten lantzen dute.
Arratsaldeko emanaldiak, 19:00etan hasiko dira, eta sarrera erosi beharko da, 4,5 euroan egin ahal izango da, irun.org webgunean.
