Abotsanitz: "Garestiagoa da ez birziklatzea, birziklatzea baino"
Hurrengo urteko zaborren tasa bozkatu zen asteazkenean, eta Abotsanitzek "birziklatzen ez duena penalizatu egin behar dela" defendatu zuen bozketan.
Hurrengo urtera begira, zaborren hiru tasaren alde agertu da udal taldea. Abotsanitz Txingudiko Mankomunitateko ohiko batzarrean egon zen asteazkenean, eta hurrengo urtean ordaindu beharko den zabor eta uren tasen inguruan eztabaidatu eta bozkatu zuten.
Mankomunitatearen proposamenarekin bat egin zutela eman du jakitera udal taldeak, eta hortaz, birziklatzen duten familien tasa izoztea, birziklatzen ez dutenena %7,5 igotzea eta egoera ekonomiko zaurgarrian daudenek erdia ordaintzearekin ados izan ziren.
Alderdiak adierazi du, hondakinen kudeaketa eredua ez dela haiek nahi duten modukoa, baina alde bozkatzearen arrazoiak bi izan direla: “Jasangarriagoa den sistema sustatzea”, eta haien esanetan, beti uste izana “birziklatzen ez duena penalizatu egin behar dela”.
Hala ere, desadostasunak ere adierazi dituzte, eta birziklatzen ez dutenei zigor ekonomikoa bakarrik ezartzearekin ez dute bat egin: “Herritarren formaziora eta azalpenen komunikaziora bideratutako neurriak ere eskatu ditugu”.
Abotsanitzek baieztatu du zaborrontzira botatzen den errefusaren eta organikoaren arteko oreka bat lortuz gero, Mankomunitateak milioi erdi euro aurreratuko lituzkeela: “Garestiagoa da ez birziklatzea, birziklatzea baino”.
