Txingudi Errugbi Taldeak denboraldi berriari ekingo dio
Asteburuan jokatuko du 21/22 denboraldiko lehen partidua Txingudi Errugbi Taldeak eta Atletico San Sebastian izango da haien lehen aurkaria.
Larunbat honetan Euskal Ligako 2021/2022 denboraldia hasiko du Txingudi Errugbi Taldeak eta Atletico San Sebastianen aurka ariko dira Kote Olaizola estadioan 17:30etatik aurrera. Jokalariak motibatuta eta txapelketa hasteko gogoz daudela adierazi du taldeak.
Duela hamabost egun bi taldeek partidu bat jokatu zuten, eta, irundarrek galdu egin zuten arren, oraingoan, “zer aurkituko duten jakitearen abantailarekin” zelairatuko direla uste dute. Mele sendoa eta joko azkarra dira donostiarren ezaugarriak eta partidu zaila izango dela aurreikusi dute. Hala ere, zailtasunak alde batera utzita, helburua neurketara mentalki %100era iristea dela diote.
Joan den denboraldian bloke bat amaitu eta taldea utzi zuten Gorka Imaz, Youssef Haddar, Unai Mayor, Albin Chalafre, Mathieu Lleset eta Imanol Aizpuruak. Horregatik, indarrak sendotzeko asmoz, Ekaitz Aia, Ivan Martin eta Lander Vielba gazteak batu dira taldera. Gainera, Javi Boes eta Luken Crouzat itzuli egin dira ere.
Iazko denboraldiarekin alderatuz, hiru talde berri gehituko dira ligara: Iruñeko La Union Ohorezko B mailatik jaitsi dena, eta, Elorrio eta Rioja, urtebetez ezin izan dutenak jokatu pandemiaren ondorioz. Denboraldi honetarako helburuak argi azaldu dituzte, play-offetan sartu nahi dute mailaz igotzeko, nahiz eta “aurkarien maila ikusita” zaila izango dutela onartzen duten.
