Pertsonen salerosketa eta sexu esklabutzaren kontra mobilizatuko dira
Etzi, Sexu Esplotazioaren eta Pertsonen Trafikoaren Aurkako Egunaren harira, performancea egingo du Txingudi Elkarte Feministak.
Sexu esplotazioaren eta emakumeen trafikoaren kontrako egunaren harira mobilizatuko dira, Irunen. Etzi, Sexu Esplotazioaren eta Pertsonen Trafikoaren Aurkako Eguna izango da, eta Txingudi Elkarte Feministak gogoan izango du: 19:00etatik aurrera, performance bat egingo du, Pertsonen salerosketari ez, esklabutza sexualari ez lelopean, Irungo Zabaltza plazan. 26 emakumek parte hartuko dutela aurreratu du, txalapartak lagunduta.
Ekintza horren bidez, delitu larri horiek jasaten dituztenen egoera salatuko dute, eta, era berean, babesa eman biziraun dutenen elkarteei. Azkenik, erakunde publikoei emakumeen esplotaziotik dirua lortzen duten pertsona, enpresa eta mafiak zelatatzeko neurri egokiak hartzeko eskatuko diete.
“Emakume guztien giza eskubideak errespeta daitezela eta emakume bat ere ez dadila, soilik emakume jaio izanagatik, zapaldua izan” aldarrikatu du Txingudi Elkarte Feministak.
