Uztapide Bertsolaria plaza berrurbanizatuko dute
Espaloia eta bidegorriak hobetzeaz gain, hainbat azpiegitura berri jarriko dituzte Arbes auzoko plazan.
Uztapide Bertsolaria plaza eta honen ondoko plaza txikia berrurbanizatzea onartu du Tokiko Gobernu Batzarrak, eta, horretarako, 646.229 euroko aurrekontua erabiliko dute. Zazpi hilabete dituzte lanak burutzeko.
Cristina Laborda Giza Baliabideetako ordezkariaren esanetan: “Berrurbanizazio honen bidez, plazak irabazi egingo du irisgarritasunean eta oinezkoen eta txirrindularien mugikortasunean”.
Lanen deskribapena
Lan hauen helburua plazako zoladura berritzea eta antolatzea dela azaldu du ordezkariak. Horretarako, gune horiek “egungo araudietara, irizpideetara eta eremu horretako beharretara” egokituko dituztela azaldu du.
Irisgarritasuna hobetzeko asmotan kotak eta pendizak aldatu eta eskailerak kenduko dituzte. Aldi berean, oinezkoentzako “behar besteko” zabalera duten pasabideak eta lorategi batzuk sortuko dituzte, Labordak adierazi duenez. Bidegorriaren trazadura ere aldatuko dutela eman du aditzera.
Iturriko uraren, euri eta hondakin uren saneamenduaren eta argiteria publikoko sarearen instalazioak berritzeko asmoa adierazi du ordezkariak. Hobekuntza lan hauek aprobetxatuz, Esteban Perez de Yerobi kalean argi berriak jarriko dira ere.
Egitura berria
Inguruan dauden kaleetara joateko loturak hobetuko dituzte, kasu honetan, Esteban Perez de Yerobi karrikara joateko bidea eta Dunboako kanalaren paraleloan doan paseoarekiko lotura.
Haurrentzako bi jolas eremu jarriko dituzte plaza nagusian eta plaza txikian ariketa fisikoa egiteko aparatu batzuk.
