Emigrazio eraikinean mural bat egiten ari da Sarah Grandes
Murala egiten amaitzean, kanpoaldeko lanak amaitutzat joko ditu udalak. Orain, barrualdea egokitzeko proiektu idazketak esleitzen hasiko dira.
Mural bat egiten ari da Sarah Grandes artista irundarra. San Miguel auzoan dagoen emigrazio eraikinaren itxuraldaketak aurrera jarraitzen du, eta, oraingoan, Sarah Grandes artista, mural bat margotzen ari da Pello Bixente karrikara begira dagoen horman. Horrela, kanpoaldeko lanekin amaituko dutela eman du jakitera Jose Antonio Santano alkateak.
Kultura km0 programaren barruan diseinatu zuen Grandesek murala, emakumea, kultur aniztasuna, immigrazioa eta mugikortasuna erreferentziatzat hartuta. Azaldu du, diseinuan “forma abstraktuak antzeman” daitezkeela eta ikusleak begirada bakoitzeko “interpretazio berriak” egin ditzakeela.
Berrikuntzak
Iazko udaran hasi ziren eraikinaren kanpoaldea berritzen, kanpo inguratzailea birgaitu, barnealdea garbitu eta estaldura zeramiko berria jarri dute fatxadetan. Aurrekontua 547.539 eurokoa izan da eta Urbycolan SLk burutu ditu lanak.
Orain, beheko eta lehenengo solairuak, auzoko gizarte ekipamendutarako izan daitezen eta gizarte zentroa bertan egon ahal izateko egokitzapen idazketak esleituko ditu udalak. Gainera, partaidetza prozesu baten ondorioz, adinekoentzako gunea bertara lekualdatuko dute, auzo elkartea ere bertan egongo da, haurtxoko bat jarriko dute eta erabilera anitzeko guneak egongo dira.
Eraikinaren inguruko kaleak berrurbanizatzeko proiektuaren idazketa prozesua martxan jarriko dela ere aurreratu du Santanok. Anaka, Pello Bixente, Blas de Lezo eta Javier Esteban karrikak berrituko dituzte.
