Iazko jarduera sozioekonomikoaz hitz egin du Bidasoa bizirik agentziak
Langabezia tasa %11,8koa zen 2020. urtea amaitu zenean, 2019. urtean baino %9,9 gehiago. Urte osoko datuak irakurri daitezke memorian.
Jardueren memoria eta iazko datu sozioekonomikoak eman dituzte Miguel Angel Paez presidenteak eta Maria Serrano presidenteordeak. Jardueren memoriaren eta Irun eta Hondarribiko datu sozioekonomikoen 2020.urteko txostena aurkeztu du Bidasoa bizirikek. Laster publikatuko dute agentziak daukan orrialdean. Balorazioan aipatu dute, garapen agentziak aurreikusita zituen proiektu gehienak jarri zituztela martxan eta jarduera ez zela gelditu.
Maria Serrano Bidasoa bizirik agentziaren presidenteordea eta Miguel Angel Paez presidentea egon dira datuak eta aurten martxan egon diren jardueren berri ematen. Serranok aipagarriak direla dio “enpresetan egindako berrikuntza ez-teknologikorako proiektuak, pertsona ekintzaileentzako beken programa finkatzea edo ekonomia zirkularreko ekimenak sustatzea”.
Paezek, aldiz, ekimen asko on line egin izana nabarmendu nahi izan du, agentzia gelditu ez izana: “enpresa, negozio eta autonomoei deiak eginez eta etengabe sortzen ari zen informazioa modu ordenatuan emanez” aritu ziren eta.
Lana sustatzeari buruzko datuak
Bidasoa bizirik agentziak emandako datuen arabera, iaz, ekintzailetza sailak 816 pertsona lagundu zituen, 80 bideragarritasun plan egin ziren, 447 pertsonek ekintzailetzarako prestakuntza jaso zuten eta ia 600 pertsonek hartu zuten parte ekintzailetza ekintzetan.
Enpresa sailari dagokionez, 117 enpresarekin egin zuten lan “hobekuntza lehiakorreko eta eraldaketa digitaleko” prozesuetan. El Espazion lan prestakuntzari buruzko 1.864 kontsulta erantzun ziren, 693 pertsonei lana bilatzen saiatu ziren eta 103 lan eskaintza kudeatu zituen zerbitzuak. Bestalde, prestakuntzari begira, orotara, 28 prestakuntza saio eta tailer egin zituzten eta 190 pertsonek hartu zuten parte.
Datu sozioekonomikoak
Biztanleria aktiboa 37.114 pertsonakoa zen iaz eta 4.374 langabe zeuden, abenduaren 31ean Lanbiden izena emandako langabezia biztanleria erreparatuz. Datu hauek diote, langabezia %9,9 hazi zela 2019. urtearekin alderatuz eta urte amaieran %11,8ko langabezia tasa zegoela Irunen eta Hondarribian.
Azaldu dute, zerbitzuen sektorea izan zela langabezia gehien jasan zuena, langabeziaren %72 hain zuzen ere. Halaber, kontratu kopuruak %28 behera egin zuen, guztira 19.167 formalizatutako kontratu egin ziren. Zerbitzuen sektorean establezimendu guztien %78ri eragin zien jaitsiera honek.
Hirugarren sektoreak “pisurik handiena” duela dio memoriak, 4.954 establezimendu zeuden eta 21.102 lanpostu sortzen zituzten. Txikizkako merkataritza da gailendu zena hirugarren sektorean, zehazki, 943 establezimendurekin, %84 Irunen eta %16 Hondarribian. Jarraian, lehen sektoreak sortzen du jarduera gehien, industrian 377 establezimendu daude 4.091 pertsonei lana ematen dienak eta eraikuntzak 1.500 pertsona ditu aktibo.
Turismoak jasan zuen beherakada agerikoa da datuetan, hotel okupazioa %39koa izan zen, pandemia aurretiko urtean %70koa izan zenean. Donostiako aireportuan bidaiari kopurua %65 jaitsi zen.
