Gazte bat atxilotu dute ustez beste gazte bat larri zauritzeagatik
Igande goizaldean, liskar bat sortu zen Urdanibia plazan. Pertsona bat larri zauritu zen, ustez botila batekin buruan kolpatu zutelako.
Igandean, 03:00etan, liskar bat sortu zen hainbat pertsonen artean, Urdanibia plazan. Udaltzaingoak eta Ertzaintzak jakinarazi dutenez, borroka horren ondorioz, pertsona bat larri zauritu zen. Ustezko erasotzailea, 18 urteko gazte bat, atxilotu zuten.
Ertzaintzak emandako informazioaren arabera, haiek iritsitakoan, gazte bat aurkitu zuten lurrean, konorterik gabe. Bertan zeudenek azaldu zieten beste pertsona batek botila batekin buruan jo zuela, liskarrean ari zirela, zaurituta utziz. Zauritutako gaztea Donostia ospitalera eraman zutela adierazi du Ertzaintzak, traumatismo larri batekin.
Handik gertu atxilotu zuten ustezko erasotzailea, lesio delitua leporatuta. Atxilotua Ertzaintzaren egoitzara eraman zuten, epailearen aurrera eraman aurretik.
Beste liskar bat, Ospitale Zaharrean
Irungo Udaltzaingoak jakinarazi duenez, beste liskar bat izan zen igande goizaldean, Irunen, Ospitale Zaharrean. Hainbat pertsona borrokan ari zirela azaldu du, eta udaltzain eta ertzainak hara joandakoan sakabanatu zituztela.
