LGTBI harrotasuna aldarrikatzeko hainbat jarduera antolatu ditu udalak
Ostadarrak nonahi, eta sentsibilizazio kanpaina identitate sexual guztiak errespeta daitezen.
Hainbat ekitaldi antolatu ditu Irungo Udalak LGBTI harrotasuna adierazteko. Gaurtik uztailaren 11 bitarte, LGTBI Komunitatearen Nazioarteko Eguna ospatzeko hainbat jarduera antolatu ditu Irungo Udalak.
Aurten, ospakizunak auzoetara gerturatzen saiatuko direla azaldu du Miren Etxebeste Berdintasuneko zinegotziak. Bere hitzetan, identitate sexual guztiak errespetatu beharraren inguruan sentsibilizatzen jarraitu behar da. Azken aldian komunitate honek jasan dituen erasoak irakurrita “oraindik ere bidea egiteko” dagoela eta aldarrikapen hauek “premiazkoak” direla nabarmendu du Etxebestek.
Ostadarra, LGTBI komunitatearen ikurrina, lau haizeetara zabalduko du udalak. Esate baterako, L2 Irun Landetxa autobus batean, 12 metroko ostadarra ikusi ahalko da kanpotik. Ekainaren 28an ere ostadar ikurrina udaletxeko balkoian jarriko dute.
Gehitu elkartearekin elkarlanean, sentsibilizazio materiala banatuko dute ekainaren 28an hiriko hainbat puntuetan: Nagore Laffage parkean, Zabaltza plazan, Alberto Anguera plazan, Lapurdi kaleko haur parkean, San Juan enparantzan, Urdanibia plazan eta Santiago auzoan Pierre Lhande ibilbidearen hasieran.
Gainera, zozketa bat antolatu du udalak. Herritarrei sare sozialetan banatuko den materialarekin Twitterren eta Instagramen argazkiak partekatzera animatu ditu Berdintasun zinegotziak, eta #HarrotasunaIrunOrgullo traola erabiliz eta @Irun_informa kontua aipatuz zozketan ahalko da parte hartu. Saria LGTBI literaturako argitalpenen hiru sorta izango direla adierazi dute udaletik.
