Eskuz binakako emakumeen masterreko finalak Uranzun jokatuko dituzte
Finalerdietako bi partidak jokatuko dira Irungo frontoian, larunbat honetan, 15:30etik aurrera. Finala, berriz, apirilaren 4ean izango da.
Uranzu berria, barrutik. Esku pilotako emakumeen Master Cup txapelketa Uranzu pilotalekuan erabakiko da. Bai finalerdiak eta finala bera Irungo frontoian jokatuko dituzte; larunbat honetan, 15:30etik aurrera, finalerdiak eta apirilaren 4ean finala.
Lehen finalerdiko bikoteak honakoak izango dira: Iera Agirre eta Maite R. Larramendi Irantzu Etxebeste eta Olatz R. Larramendiren kontra. Bigarren finalerdian, berriz, Olatz Arrizabalaga eta Naroa Agirrek Leire Garai eta Oihana Orbegozoren aurka. ETBn ikusteko aukera izango da.
Uranzu pilotalekuan jokatu zituzten emakumeen kopako finalak iaz ere, eta aurten gizonen eskuz binakako lehen jardunaldia ere toki berean jokatu dute.
