Hainbat migratzaile Gurutze Gorriaren dispositibotik at uztea onartezina dela esan du EH Bilduk
Egoera larri honek berehalako konponbidea behar duela diote eta udal gobernuari eskatu diote egin beharreko ekinbideak burutu ditzala, egora honi lehenbailehen irtenbide bat emateko.
Migratzaileak kalean uzten ari direla salatu du EH Bilduk. Irungo Harrera Sareak azaldu duenez, bosgarren egunez jarraian Gurutze Gorriak euren dispositibotik at utzi ditu hainbat migratzaile, kalean lo egitera derrigortuz.
EH Bilduk egoera hau onartezintzat jo du eta berehalako konponbideak eskatu dizkio udal gobernuari. Horretarako, eskua luzatu dio alderdiak.
Dispositiboan lekua egon arren, espazio honen erabiltzaileak kale gorrian utzi izana salatu dute. 50 pertsonentzako lekua dagoela azaldu dute eta okupazio handieneko egunean 15 ohe erabili zirela gaineratu dute.
Irunera iristen diren migratzaileek, migrazioan zehar zailtasun berriekin topo egiten dutela adierazi du udal taldeak. Beraien hitzetan, gurean inposatutako mugan dauden kontrolek ia ezinezkoa egiten die hura zeharkatzea. Zailtasun hauek are gogorragoak bilakatu direla nabarmendu dute, pandemia dela eta.
Kanariar Uharteetan migratzaileak jasaten ari diren tratu txarren berri direla ohartarazi dute eta Irunen ezin dela berdina gertatu esan dute.
Amaitzeko, Irungo Harrera Sareak duela bi urtetatik egiten ari den lana, balioan jarri, eskertu eta txalotu nahi izan dute.
