Herriko ehun ekonomikoa babesteko proposamenak aurkeztu ditu Abotsanitzek
'Itxeki Hondarribia!' programan egindako akatsak zuzendu eta diru laguntza programa berri bat eskatu du udal taldeak.
Itxeki Hondarribia! programa zuzentzea eskatu du udal taldeak. Herriko ekonomia astintzen ari den bigarren olatuan gaudela esan du Abotsanitzek eta egoera ekonomiko honi aurre egiteko hainbat proposamen helarazi ditu.
Itxeki Hondarribia! jada martxan dagoen programako aurrekontutik erabili ez den dirua baliatzea proposatu dute.
Azaldu dute 500.000 euro aktibitate ekonomikoak mantentzeko, eta beste 500.000 euro herriko kontsumoa sustatzeko balioko duten familientzako bonuetan erabili daitezkeela. Modu honetan, herriko ekonomia babestuko litzateke udal taldearen iritziz.
Alderdiak salatu du, orain arte diru laguntza hauek jasotzeko zailtasunak izan dituztela herritarrek, prozedura korapilotsua medio. Prozedura konplikatu honen ardura udalak duela esan dute.
Izan ere, udal talde guztiek enpresentzako eta familientzako programa adostu zutela adierazi dute baina udal gobernuak akordioa moldatu zuela, diru laguntzak murriztuz.
Enpresentzako aurreikusitako kopurua 1.115.000 eurokoa izan zela eta honi beste 300.000 euro gehitu behar zaizkiola esplikatu dute. Banatu beharreko dirua %15era ez dela iristen azaldu dute.
Bukatzeko, Itxeki Hondarribia! programak dituen akatsak zuzentzea eskatu dute eta diru laguntza programa berri bat abian jar dezatela.
