Zortzi sagardo eta bazkari bat zozketan
Sagardo Eguna egingo dute larunbatean Gipuzkoa plazan.
Zortzi sagardo dastatzeko aukera izango da Hondarribiko Sagardo Egunean. Larunbatean egingo dute Gipuzkoa plazan, 18:00etan hasita. Muara Kultur Elkarteak antolatu du, Olagarro elkartearen laguntzarekin. Basoaren prezioa 7 eurokoa izango da eta prezioaren barruan pintxo bat jateko aukera egongo da. “Honetaz gain, basoa erosi dutenen artean bi pertsonentzako bazkari bat zozketatuko dugu Antxiña jatetxean”, jakinarazi dute antolatzaileek.
Beko-Errota (Hondarribia), Irungo Ola (Irun), Larregain (Hernani), Camino Berri (Biriatu), Zabala (Aduna), eta Lizeaga, Oialumezar eta Petritegi (Astigarraga). Sagardo horiek izango dira dastatzeko, gehienak txotx eran. Giroa berotzeko askoren beharrik izango ez den arren, zuzeneko musika presente izango da larunbat arratsaldean Gipuzkoa plazan, baita jaiari hasiera emango dioten bertsolariak ere, eskualdeko bertso eskolako kideak.
“Haur motxiladunak”, dispertsioaren eraginez aita edota ama bisitatzeko milaka kilometro egin behar dituzten umeak izango dituzte gogoan aurtengo ekitaldian, bereziki herriko preso bakarraren alaba: “Urko Labeaga Garcia euskal preso politikoaren alabak bizi duen egoera ankerra eta injustizia azaleratu nahi genuke”.
