Tokiz eta formatuz aldatuta, baina Txikimusika
Anita y los peleles taldeak kirol kaian joko du igandean, Txikimusika jaialdiaren bertsio murriztuan.
Kirol kaian egingo dute eta bertan izan da aurkezpena
Udaberrian egin behar zuten baina eguraldiak ez zuen lagundu. Igandean, hilak 14, kirol kaian, hori da Txikimusikaren plan berria. Formatu murriztuarekin dator aurten, Anita y los peleles rock-swing taldearen kontzertuarekin. Ez udaberrian, ez Kasino Zaharrean, ezta egun osoko festa ere, baina helburua ez da aldatu. Igandean kirol kaian, familientzako musikari lotutako plan bat izango da.
Ezmuga elkarteak eta Txikis del Bidasoa agerkari digitalak antolatutako festa da Txikimusika, sortu zenetik Hondarribiko Udalaren laguntza izan duena. Aurten kirol kaian egingo dute lehenbizikoz eta bertan aurkeztu dute gaur goizean, eta han izan dira Juan Luis Silanes Kultura zinegotzia, Txikis del Bidasoako Ainara Rubio eta Pia Alzaga, eta Oriol Ruiz Cabestany Euskadiko Kirol Portuetako ordezkari gisa.
Seigarren urtez egingo da aurten, lehen aldiz udara garaian. “Joan den maiatzean Kasino Zaharrean egin behar genuen ekitaldia da –azaldu du Silanesek–, eguraldi txarragatik bertan behera utzi behar izan genuena”. Orain arteko ekitaldi guztiek arrakasta izan dutela nabarmendu du zinegotziak.
Data eta leku berria izango du seigarren ekitaldiak, baita formatua ere: “Musika izango da protagonista bakarra aurtengoan” azaldu du Alzagak. Hala, Anita y los peleles Bilboko taldearen kontzertua antolatu dute aurtengo bertsio murrizturako. “60. hamarkadako rock, swing eta antzeko musikak eskaintzen dituen taldea da, beti ere familiei begira. Pena mereziko du”, erantsi du Alzagak.
Arratseko zazpietan hasiko da emanaldia, eta, Rubioren arabera, ordua ez dute pentsatu gabe aukeratu: “Uste dugu aukera egokia dela hondartza jardunaldia igaro ondoren musika onarekin eguna amaitzeko”.
