Sustraia taldeak Enrique Lekuona omenduko du ostiralean
Omenaldi "xumea" eskainiko diote 'Mariñel' itsasontziaren ondoan.
Hilaren 12an bi urte beteko dira Enrique Lekuona hil zenetik. Besteak beste, Sustraia boluntario taldeko kidea zen Lekuona eta, hain zuzen ere, Sustraiak zaharberritzen ziharduen Mariñel ontzitik erorita jasandako zaurien ondorioz hil zen. “Sustraia taldearentzat, halaber sendi eta lagunentzat, Enriquerik gabeko bi urteok mingarriak eta ahaztezinak izan dira”, adierazi dute bere taldekideek.
Zabaldu duten oharrean nabarmendu dutenez, hutsune handia utzi du ingeniariak boluntario taldean: “Enrique lagun ona zen, bere laguntza, ardura, interesa, irabazi asmorik gabe eta adituaren lanarekin lagundu zuena, Mariñel itsasontziaren berreskuratzea bideratzen”.
Horregatik guztiagatik, omenaldi xumea eskainiko diote ostiralean 12:00etan Mariñel-en ondoan, “Enriquerekin bizi izan dugun guztiarengatik”. Omenaldi irekia izango dela jakinarazi dute Sustraiakoek: “Gurekin egon nahi duzuen pertsona guztiak zaudete gonbidatuta”.
