Bertso mendaria egingo dute ostiralean Muaran, azkena omen
Irunabar, Irungo Bertsoaren Bilguneko bertso tailerrak antolatu du, ikasturtea ondo amaitzeko.
Otsaila bukaeran egin zuten lehena. Bihar (ostirala) bigarrena eta momentuz azkena. “Horrek ez du esan nahi urtea amaitu aurretik besterik antolatuko ez dugunik, baina hel diezaiogun, oraingoz behinik behin, ekainean datorkigun honi”.
Irunabar, Irungo Bertsoaren Bilguneko bertso tailerrak antolatu du mendaria, ikasturtea ondo amaitzeko. Muara elkartean egingo dute 19:30etik 22:30era, eta denetarako aukera izango da, jateko, edateko eta bertsotan aritzeko. “Estreinakoan bezalaxe, jatekoa eta edatekoa izango da, merke eta ona, eta bertsoa izango da protagonista nagusi”, azaldu du Irunabarrek.
Lehenengoan egon ez duenarentzat, hortxe azalpena:
Ez dakizula zer demontre den
‘bertso mendari’ horiena?
Eremu libre bat izan nahi du
horra helburu behinena
protagonista nagusi, baina,
bertsoa izango duena.
Jendeak elkar ezagutzeko
balia dezakeena
jaki-edari merke eta onak
eskainiko dituena
be[rt]so ta mikro zabalik zuek
agertu zain dagoena.
