Wheels and waves jaialdiaren bisita asteazkenean
Retro ukituko hiru mila motok inbadituko dute herria.
Iazko lasterketetako une bat (arg: Pauline Johnson) Wheels and waves, moto zaletasuna, surfa, artea eta musika uztartzen dituen Biarritzeko jaialdiak Hondarribia bisitatuko du asteazkenean. Zortzigarren ekitaldia egingo dute bihartik igandera eta, hain zuzen ere, lehen egunean iritsiko da herrira. Bost kontinenteetako retro ukituko 3.000 moto inguru espero dira.
Aurreko urteetan bezala, bi ekitaldi burutuko dituzte Hondarribian. Aurrena, 13:00etatik aurrera, Punk’s Peak Race azelerazio lasterketak egingo dituzte Jaizkibelen, paradore zahar inguruan. Gidarien artean bi aldiz Superbikeseko munduko txapeldun izandako Troy Corser australiarra, eta skateboarding munduko mito bilakatu den Steve Caballero skater mexikarra egongo dira.
Lasterketen ondoren, Portura mugituko da Wheels and Waves. 16:00etatik aurrera Afamada Orquestina DJak rock musikaz zipriztinduko du auzoa, eta moto zaleak iritsi ahala San Pedro kalean eta Butron pasealekuan erakutsiko dituzte euren makinak, publikoak gertutik ikusteko aukera izan dezan. Antolatzaileen arabera, zortziak aldera itzuliko dira Biarritzera.
