Hasi da baserritarren zaindariaren eguna
San Isidro ospatuko dute gaur Guadalupeko zelaietan. Zelaiak bedeinkatu dituzte jada.
Eguraldia lagun dutela hasi dute baserritarrek euren egun handia. San Isidro da gaur, baserrian lan egiten dutenen zaindaria. Urtero bezala, Guadalupen ospatuko dute hondarribiarrek, eta urtero bezala, zelaien bedeinkapenarekin hasi da eguna.
Hamarrak eta erdietan abiatu dira prozesioan santutegitik. Guadalupeko zelaiak zeharkatu eta gero, muinoan, gurutzearen ondoan bedeinkatuko dituzte zelaiak. Aitor Mendiluze eta Beñat Lizaso bertsolariek lagundu dute ekitaldia. Jarraian, tenplura itzuli da taldea, San Isidroren omeneko meza ospatzeko.
Eguerdian giro aparta espero da Guadalupen. Herri kirol festa egingo dute, aizkolarien eta harri jasotzaileen arteko demarekin. Zer jan eta zer edan ez da faltako.
Bukatzeko, Alkartasuna elkartean bilduko dira Hondarribiko baserri eremuko emakume, gizonek eta haurrek, elkarrekin bazkaltzeko.
Ohi bezala, Guadalupeko muinoan egin dute zelaien bedeinkapena, gurutzearen ondoan
