Hasi da Hondarribiko udaletxerako lehia
Abotsanitzek kanpaina hasteko ekitaldia du gaur. EH Bilduk ekitaldi politikoa antolatu du iganderako.
Hasi da Udal Hauteskundeen kanpaina, ofizialki behintzat. Bart gauetik aurrera hautagaiek botoa eskatzeko aukera dute, orain arte ezin baitzuten hori egin. Bi aste izango dituzte horretarako, hiritarrei erakusteko haien programa dela onena, eta beraiena baino hautagaitza hoberik ez dagoela. Guztira, sei dira aurkeztu diren alderdiak: EAJ, Abotsanitz, EH Bildu, PSE-EE, PP eta Vox.
Hondarribiko hiru alderdi nagusiek, EAJk, Abotsanitzek eta EH Bilduk atzo bertan ekin zioten kanpainari. Jeltzaleek ohiko kartel jartzea burutu zuten, eta Abotsanitzek kanpainako bideo ofiziala zintzilikatu du sare sozialetan. Kolalizio abertzaleak, aldiz, umore puntua jarri zion kanpaina hasierari, Iturriberriko biribilgunearen ingurazioa eginez.
Gaur eta bihar
Abotsanitzek kanpaina hasteko ekitaldia egingo du gaur San Pedro kaleko egoitzaren parean, 19:00etatik 20:00etara. Zerrendako kideek hartuko dute parte, horien artean Igor Enparan alkategaiak.
EH Bilduk, aldiz, iganderako (hilak 12) ekitaldi politikoa antolatu du, hauteskunde zerrenda aurkezteko. Gernikako arbolan egingo dute, 12:00etan. Xabier Isasi alkategaiarekin batera Juan Karlos Izagirre Ahaldun Nagusi izateko hautagaiak eta Nerea Kortajarena legebiltzarkideak hartuko dute parte.
Gainontzeko alderdiek, momentuz behintzat, ez dute hurrengo egunetarako deialdirik aurreratu.
