Deklaratzera deitu dituzte Egiluz jauregia okupatu zutenetako lau, bat adin txikikoa
Epaileak onartu egin du deklarazioa atzeratzeko gazteen eskaera. Hurrengo astean egin beharko dute.
Epaileak atzeratu egin du Egiluz jauregia okupatu zuten gazteen kontrako epaiketa azkarra. Hiru dira gaur goizean Irungo epaitegira deklaratzera deituak zeuden gazteak eta laugarren batek Donostiako epaitegira joan beharko du, adin txikikoa delako.
Goizeko bederatziak eta erdietan deklaratu behar zuten hiru gazteek, eta ordu erdi lehenagotik berrogei pertsona inguru elkarretaratu dira epaitegi parean, gazteei babesa adierazteko.
Gazteek atzerapena eskatu dute, haietako bat kanpoan dagoelako eta abokatua lortzeko astirik izan ez dutelako —atzo arratsaldean jaso zuten zitazioa—. Gainera, euskaraz deklaratzea eskatu dute eta horrek gaurko saioa aurreikusitakoa baino ia bi ordu beranduago hastea ekarri du.
Azkenean, epaileak onartu egin du gazteen eskaera, eta hurrengo astera atzeratu du epaiketa azkarra. Astelehenean itzuli beharko dira epaitegira, eguerdiko hamabietan.
