Hondarribiko Udalak bi marka izango ditu aurrerantzean
Irudi korporatibo berria aurkeztu dute, erakundearen aurpegi gisa eta komunikatzeko erabiliko dena.
Alkatea eta Turismo zinegotzia, marka berria aurkezten
Irudi korporatibo berria du gaurtik Hondarribiko Udalak. Ate ireki bat irudikatzen duen ‘H’ berdea da marka berria; azpian Hondarribia hitza azaltzen da, grisez. Otsailaren 28ko plenoan onartu zen aldaketa eta gaur goizean Txomin Sagarzazu alkateak eta Maria Serrano turismo zinegotziak aurkeztu dute. Alkateak argitu duenez, marka berriak ez du zaharra ordezkatuko: “Ekitaldi ofizialetarako bestea erabiltzen jarraituko dugu eta hau egunerokotasunean gehiago erabiltzeko sortua da, besteak beste”.
Serranok azaldu du gauza bat dela armarria eta beste bat erakundeak erakutsi behar duen irudia. Bere hitzetan, armarria ez zen erakundearen irudia emateko egokia, ezta komunikatzeko ere: “Irudi moldakorrago bat egin da eta Hondarribia hobeto ikusi eta ikustarazten da. Edozein erakundek bere burua azaltzeko modua azken urteotan asko aldatu da, eta nahiz eta gure armarriarekin gustura egon, komunikatzerako orduan egokiena ez zela ere ikusten genuen”.
Ateaurrearen irudia
Hondarribiko Udalaren marka berriak Santa Maria ateaurrea du oinarri. “Irudian Hondarribiaren ‘H’ hizkia ikusten da, Santa Maria ateaurrea izango balitz bezala”. Zinegotziak gehitu duenez, “irekita dagoen ate bat izan nahi du”. Armarriak kolore asko baldin baditu, ikur berriak bi baino ez, marrazkiaren berdea eta letren gris kolorea.
Aurkezpenaren ondoren, udalaren irudi korporatiboaren berritzea gauzatuko du erakundeak, eta hori pixkanaka egingo dela jakinarazi du Serranok: “Datozen aste eta hilabeteetan irudi hau zabaltzen joango gara. Ez da egun batetik bestera egiten den lana, baina bai dela gure asmoa euskarri eta forma desberdinetan ezagutarazten joatea”.
