"Elektronika taldea izan nahi duen rock taldea gara"
Iñaki 'Matxet' Altolagirre sanjuandarraren talde berria da Sega Sound Killers. Hondarribiko Psilocybenean emango dute lehen kontzertua, "oso indartsua eta oso bisuala".
Sega Sound Killers (arg: G. Bravo) Bizirik daude eta larunbatean erakutsiko dute. Sega Sound Killers (SSK) rock elektroniko taldeak bere lehen kontzertua emango du Hondarribiko Psilocybenea aretoan. Iñaki Matxet Altolagirre sanjuandarrarekin hitz egin dugu proiektu berriaz. Ondoan ditu taldean Eneko Lusar oiartzuarra (teklatuak), Eneko Larrañaga oreretarra (bateria) eta EKTZ DJ hondarribiarra. Mezu argi batekin datoz, “we are alive“, eta Mendeluko aretoaren soinu eta argi gaitasun guztiak mugaraino eramateko mehatxua egin dute.
Matxetek HITZAri azaldu dionez, elektronika egiten du laukoteak, baina rocka dute zainetan. “Laurak rock mundutik gatoz, eta hori da gure DNAa, baina elektronika taldea gara, elektronika taldea egiten saiatzen den rock taldea da Sega Sound Killers. Estilo asko darabiltzagu, elektronika gogorra, baina baita bisturi lanekoa, sentsuala eta sexya. Zinema ere asko gustatzen zaigu, eta gure musikak badu zinematik zerbait, eta larunbatekoa oso zinematografikoa izango da”.
We are Alive da taldeak orain arte aurreratu duen kanta bakarra. Abesti indartsua, erraz sartzen dena, eta erloju-bonba bat zuzenean. Lehen segundotik oso bizirik daudela erakutsiko dute Psilocybenean: “Garrantzia handia ematen diogu musikari, baina baita irudiari ere. Lehen aurkezpena izanik, asko zaindu dugu larunbatekoa. Lehen momentutik dena ematera aterako gara, emanaldi oso indartsua izatea da gure asmoa”.
Taldearen izenak bideo jokoen belaunaldiari egiten dio erreferentzia, baina sanjuandarrak zehaztu duenez, ez da bideo jokoen zaletasuna taldekideak elkartzen dituena, “nerabe zarenean gauzengatik duzun ilusioa eta energia baizik”. Horren bila joan da SSK laukotea osatzerakoan. Ilusio horrez gainezka daudela esan du, eta Psilocybeneara hurbiltzen diren zaleak zipriztindu nahi dituzte, kontzertuan lehenik, eta kontzertuaren ondoren luzatuko duten SSK Party-an gero.
23:00etan hasiko da Sega Sound Killers taldearen estreinaldia; ordubete lehenago irekiko dituzte ateak. Sarrera aldez aurretik erosi nahi duenak 10 euro ordaindu behar ditu (erosi). Leihatilan, 12 euroan jarriko dituzte, 21:00etatik aurrera. Gero beste batzuk etorriko dira, baina Hondarribikoa berezia izango dela ziurtatu du Altolagirrek: “Urduri gaude lehen honi begira. Oso berezia da guretzat eta oso ondo prestatzen ari gara. Dudarik gabe, kontzertu oso berezia da Hondarribiko Psilocyben eskainiko duguna”.
