Jaizkibel konpainia: "Alarde Fundazioaren proposamena berandu dator"
Konpainia parekideak aldundiak zabaldutako elkarrizketa bideari eutsi nahi dio. Alarde Fundazioko kideak ere ari dira bertan parte hartzen.
Jaizkibel konpainia, 2018ko alardeko arratsaldeko desfilean. Jaizkibel konpainiak uste du Alarde Fundazioak egin berri duen elkarrizketa proposamena epez kanpo dagoela: “Berandu dator. Alarde Fundazioak bere burua eztabaidatik kanpo kokatzen du, eta besteok eseri nahi gaitu balizko mahai batean”. Sare sozialen bidez emandako erantzunean, konpainiak adierazi du eskertzen duela emakume soldadurik gabeko desfilea bultzatzen duen erakundea “azkenean” elkarrizketaren alde agertu izana, baina Gipuzkoako Foru Aldundiaren ekimenez abian den elkarrizketa prozesua eman du zilegi. “Bi prozesu paralelok ez dute logikarik”, zehaztu du.
Elkarrizketa prozesu hori urte hasieran abiatu zen. Diskrezioz ari dira. Bertan Jaizkibelek berri eman duenez, konpainia parekideko hainbat kide parte hartzen ari dira prozesu horretan parte hartzen, baita Alarde Fundaziokoak ere.
Eta abian den bidean jarraituko duela jakinarazi du Jaizkibelek, “Abian dagoen elkarrizketa prozesuari eutsiko diogu. Bide horretatik eta beste hainbat bidetik, Alardearen gatazkari konponbidea ematen ahaleginduko gara, azken 20 urtean egin dugun bezalaxe”.
