Boluntarioak behar dira Jaitzubia garbitzeko
Itsas zabor bilketa egingo dute igandean, hilak 10, Hondarribiko Jaitzubiko paduretan, eta boluntarioak behar dituzte. Surfrider elkarteak koordinatutako ekintza da, babestutako gune naturalen babesa helburu duen Libera programaren barruan. Hainbat elkarte eta erakundeen laguntza du, besteak beste, Irungo Plaiaundiko Txingudi ekoetxeak bat egin du deialdiarekin.
Azken enbaten eraginez pilatutako hondakinak kendu nahi dituzte, itsasgorekin edota erreken ur emari handien ondorioz iritsitakoak. 10:00etatik 14:00etara egingo dute garbiketa, eta edozeinek parte har dezake. Hori bai, ezinbestekoa da aldez aurretik izena ematea, jarduera behar bezala antolatzeko. Izena eman nahi duenak posta elektronikoz idatzi edo 653 37 15 24 telefono zenbakira deitu behar du.
Garbiketa Jaitzubian egingo den arren, jarduera Plaiaundin hasiko da. Bertan azalpenak jasoko dituzte boluntarioek eta, ondoren, Jaitzubiko paduretara mugituko dira.
