Gogoz sartu da urteko lehen enbata
Eguerditik aurrera abisu horia emanda dago gaurko, eta alerta laranja bihar egun osorako. Euri asko eta itsaso zakarra espero da.
Iritsi da urteko lehen enbata, baita gogoz iritsi ere. Euskalmet, Euskal Meteorologia Agentziak jakinarazi duenez prezipitazio asko dakarren fronte indartsu batek Euskal Herria zeharkatuko du gaurtik etzira bitartean: “Datorkigun denboralea gogorra izan daiteke, izan ere, hainbat aldagaiek (elurra, prezipitazioa, haizea, eta itsasoko egoera) eragindako egoerak muturrekoak izan daitezke”.
Eguerditik abisu horia emanda dago gaurko, astearterako. Gipuzkoako kostaldean euri iraunkorrak, haize bolada indartsuak eta olatuak espero dira. Bihar egoerak okerrera egingo du, eta alerta laranja ezarri dute egun osorako. Egoera horren aurrean, biharko Damarriko azoka bertan behera geratu da.
Asteazkenean euri asko botako du, 24 ordutan 80 litrora iritsi daitekeelarik —gaurko 60 litro arte espero da—. Itsasoari dagokionez, asko zakartuko da eta ez itsasoratzeko eskatu du Segurtasun Sailak. 4-6 metro arteko olatuak espero dira eta 7 indarreko ipar-mendebaldeko haizea. Olatuek gogor jo dezakete kostaldea eta babes hormak gainditu ditzakete. Udalak Bentako beheko aparkalekuan seinaleak jarri ditu, “uholde arriskua iragarriz”. Horrez gain, espigoia eta Kai Berriko oinezkoen bidea itxiko ditu. “Hiritarrari tentuz ibiltzea eskatzen zaio”, gaineratu du udalak.
Ostegunean enbatak indarra galduko du. Euria egiten jarraituko du, gutxiago bada ere. Olatuen altuera baxuagoa izango da eta ez du hain gogor joko. Nolanahi ere, abisu horia eman dute ostegunerako Gipuzkoako kostaldean.
