Gabonetan 10-12 urtekoei irekiko diete patinaje tailerra
Hilaren 26an ate irekietako saioa egingo dute Jostaldin, eta taldetxoa osatuko balitz, urtarriletik aurrera jarraipena izango luke.
Urritik Eskola Kirola barruan egiten ari diren patinaje tailerra, 10-12 urte bitarteko gaztetxoei zabalduko diete Gabonetan. Hilaren 26an (asteazkena) ordu eta erdiko ikastaroa egingo dute Jostaldi pilotalekuan, 17:00etatik 18:30era. Proba bat izango da baina, taldetxoa osatuz gero, jarraipena izango luke heldu den urtean: “Saio honen helburua da patin ikastaroetan zer egiten dugun ezagutzera ematea eta ahal bada gaztetxo taldea osatzea urtarriletik aurrerako patin saioetarako”.
Adi, tailerra Jostaldin egingo baitute, eta ez orain arte Eskola Kiroleko saioak jasotzen dituen Soroetan. Gainera, aurrerantzean Eskola Kiroleko saioak ere egingo dira Jostaldin. Orain arteko saioetan kexak izan dira Soroetaren egoera dela eta, garbiketa ezagatik batez ere. “Agerian geratu da Soroetako pilotalekua ez dela egokiena patin ikastaroa burutzeko”, azaldu du arduradunak.
Horregatik, urtarrilaren 11tik aurrera Jostaldin egingo dira patinaje saioak, bai Eskola Kirolakoak, baita, taldetxoa sortuz gero, 10-12 urte bitartekoenak.
