Hiru puntu baino gehiagoko garaipena
Ohorezko Mailako taldeak Añorgari irabazi dio, eta aurkariekiko tartea murriztu du.
Hondarribia Futbol Elkarteak 3-1 irabazi zion igandean Añorgari, Ohorezko Mailako 14. jardunaldiaren barruko partidan. Denboraldiko bigarren garaipena lortzeaz gain, asteburu bikaina izan da berdeentzat, 10. postutik beherakoen artean irabazi duen talde bakarra izan delako. Oraindik zuloan sartuta daude, baina orain gertuago dituzte aurkariak, gertuena lau puntura (ikusi sailkapena).
Añorgaren aurkako partidan Koldo Aranburu eseri zen etxekoen aulkian. Larunbatean jakinarazi zuen elkarteak Xanti Lazkozek ez zuela jarraituko, eta orain arte eginiko lana eskertu egin diote Lazkozi. Aranbururen estreinaldian lortu du Hondarribiak ligako bigarren garaipena, aurreko bost partidetan beste horrenbeste porrot jaso eta gero.
Ez zen partida erraza izan, aurkariak ez baitzion etxeko taldeari erraztasunik eman. Nolanahi ere, eta puntuen beharra zuen arren, Hondarribiak partida serioa jokatu zuen, zelaian ondo kokatuz eta gol aukerak sortuz.
Imanol Kanpandegik ireki zuten markagailua, 29. minutuan, baina añorgarrek atsedenaldiaren aurretik berdindu zuten. Bigarren gola Ion Olaetxeak sartu zuen (68), eta hirugarrena Xabier Elberdinek, 82.ean. Hortik aurrera ez zen markagailua berriro mugitu eta garaipena etxean geratu zen.
Hurrengo bi partidak ere garrantzia handikoak izango dira hondarribiarrentzat. Lehenengoa Lesakan jokatuko du, 11. dagoen Beti Gazterekin. Bigarrena, etxean, azken laugarren Elgoibarren aurka. Bi partida horietan ahalik eta puntu gehien lortu behar dituzte berdeek, lehen itzulia Arrasaten bukatuko baitu taldeak, egun bosgarrena den Mondragon taldearen kontra. 2019ko lehen partida izango da hori.
Bigarren zatian gailendu zen taldea
Asteburuko kirol emaitzak
