Endaneara, begiak itxita
Bisita sentsoriala egingo dute igandean Endanean. Bildutako dirua itsuek euskarazko zinema "ikustea" bilatzen duen Zinebai proiektura bideratuko da.
Bisita sentsoriala, begiak itxita, hori da bihar igandean egiteko Hondarribiko Endanea Garden Center lore saltokian egin duten proposamen solidarioa. Bi txanda izango dira, 10:30etik 11:00etara lehenengoa, eta 11:00etatik 11:30era, bigarrena.
Prezioa 10 eurokoa da (4 urtetik beherakoak, doan), eta ezinbestekoa da aldez aurretik izena ematea. Hiru moduetara egin daiteke, Endanean bertan, 943 64 17 10 telefono zenbakira deituz, edo posta elektronikoz.
Jarduera solidarioa da, bildutako diru guztia Zinebai proiektura bideratuko baita. Audio-deskripzioen bidez, itsuek eta ikusmen zailtasun larriak dituzten pertsonek euskarazko zinema “ikustea” bilatzen du Zinebaik. Beste hizkuntza batzuetan ohikoa da aukera hori, baina euskaraz ez da existitzen, eta 2019an hiru film audio-deskribatu nahi dituzte, horien artean Dibulitoon ekoiztetxea sortzen ari den Elcano, lehen munduko bira.
Irakurri Zinebairi buruzko erreportajea
