Auzolana egingo dute Amute-Kostan, festei begira
Egoitza prestatzeko askotariko lanak egingo dituzte asteburuan, eta laguntzeko deia luzatu diete auzotarrei.
Urriko lehen asteburuan egingo dituzte Amute-Kostako festak baina, aurretik, dagoeneko festen klasiko bat antolatu dute aste honetako ostiral, larunbat eta iganderako: festen aurretik egoitza prestatzeko auzolana. Auzotar guztien laguntza behar dute, baita ‘nik ez dakit ezer egiten’ esaten duen horrena ere.
“Arotz lanak, elektrizitatea, igeltserotza, garbiketa eta hainbat lan ezberdinak egingo ditugu”, azaldu du auzo elkarteak. Edozeinek parte har dezake, hori bai, aldez aurretik izena ematea eskatu dute, “materiala erosi eta lanak egoki banatzeko”. Izena emateko 652 72 73 74 telefono zenbakira deitu behar da, edo posta elektronikoz idatzi.
Ostiralean hasiko dute auzolana, 18:00etatik 20:00etara, lan antolaketarekin. Larunbatean egun osoz lan egingo dute, 09:00etatik 20:00etara. Iganderako azken ukituak eta garbiketa utziko dituzte; 10:00etatik 13:00etara geratu dira igandean.
Festei begira egoitza prestatuko dute Amute-Kostako auzotarrek
