Bi blues kontzertu, datorren astearen zain ez egoteko
Ostiralean, Dr. Maha's Miracle Tonic taldeak joko du, eta larunbatean, Los Blues Morning Singers laukoteak. Bi kontzertuak doan izango dira.
Datorren astean egingo dute Hondarribia Blues jaialdiaren 13. ekitaldia, ostegunetik igandera. Baina egun batzuk lehenagotik izango da blues giroa herrian. Izan ere, ostiral eta larunbaterako aurretiko kontzertuak antolatu dituzte kirol kaian.
Ostiralean, Dr. Maha’s Miracle Tonic banda bilbotarrak swingarekin eta bestelako doinu dantzagarriekin zipriztinduko ditu kirol kaira hurbiltzen direnak. 20:00etan hasiko da emanaldia.
Eta larunbatean, ordu berean, Los Blues Morning Singersen txanda izango da. Jump & shout diskoa kaleratu dute aurten eta bertan euren eraginak nondik datozen azaltzen dute: blues, jazz, funky, rhythm and blues…
