LGTBI Harrotasunaren Eguna ospatuko dute lehen aldiz Hondarribian

Fenomena Kultur Elkarteak LGTBI Eguna antolatu du biharko. Aitortza egiteko eta hausnarketarako jardunaldia izatea nahi dute.

Asier Perez-Karkamo

Hondarribia

2018/06/27

LGTBI Eguna ospatuko dute bihar Hondarribiko Arma Plazan, Harrotasunaren Egunaren nazioarteko deialdiaren bat eginez. Lehen aldia da Hondarribia egiten dena, eta Fenomena Kultur Elkartearen eskutik iritsi da albiste ona (ikusi egitaraua behean). Ernesto Villar Fenomenako kideak argitu duenez, “keinu bat” izan nahi du biharkoak: “Gauza txiki bat izango da, asmo handirik gabea, baina inportantea. Herri mailako keinu bat izatea nahi dugu, gizartea kontra izan duten kolektibo eta pertsonei babesa adierazteko”. Era berean, hausnarketarako eguna izatea nahiko luke Fenomenak, “etxean, kalean, gaiaz hitz egin eta hausnartu dezagun”. Lander Berges Sanchezek irakurriko du Hondarribiko lehen LGTBI Eguneko pregoia. Gonbita jaso eta gero bere Facebook orrian desberdinak izateagatik Hondarribian biolentzia jasan zutenekin gogoratu da Berges: “Hondarribia ez da kolektiboarentzako bortitza, atsegina eta ideala dirudi, baina hori horrela da nire belaunaldiaren aurretik beste batzuek borrokatu behar izan zutelako, arrantzale herri hiri txiki baten testosteronari aurre egin ziotelako”. Biharko ekitaldiaren antolatzaileen ustez, bada ordua “ikusezin garaiak amaitzeko”, eta gazte hondarribiarrei mezu bat luzatu diete: “Aniztasuna onartzen duen herri batean” bizi direla. Honela dio, hitzez hitz, Fenomena Kultur Elkarteak LGTBI Egunari lotuta zabaldu duen mezua:

“Beti esan ohi da herri txikiak armairu antzeko bat izan direla LGTBI pertsonen armairuaren barnean. Nazioarteko egun kosmopolita honetan geure hurbileko, auzoko eta instituzioetako laguntza adierazi nahi diegu LGTBI diren pertsona guztiei eta, kolektibo horrek eurekin zerikusirik ez duela uste dutenei, edo egongo ez balitz bezala jokatzen dutenei esan nahi diegu, ikusezin garaiak amaitu egin behar duela eta, normaltasunak ezin duela egun bat gehiago itxaron.

Gazteei, beren sexualitatea aurkitzen dutenerako mezu hau eman nahi diegu, herri txiki baten bizitzeak dituen bizi kalitatea, lasaitasuna, hurbiltasuna eta itsasoa eta mendia bertan izatearen abantailaz gain, aniztasuna onartzen duen herri ireki batean bizi direla.

Armairu mitikoa ez da eurena, gizartearena baizik. Alferrikakoa da batetik ateratzea, demoniozko labirintoa bailitzan, beste armairu handiago batean sartzeko. Eraitsi behar dena, argitu behar dena, geure kaleak, etxeak, ikasgelak, lantokiak, tabernak eta hau bezalako plazak dira.

Hala bedi”.

LGTBI Eguna. Egitaraua

18:00etan, aurkezpena. Musika, Leire IF DJ-aren eskutik.
18:30ean, pregoiaren irakurketa.
19:45ean, pintxo pote musikala Alde Zaharrean zehar.
22:30ean, amaiera.

Adierazpen instituzionala onartu dute

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.