"Egun trendya ez den bertako hizkuntza aldarrikatzeko balioko du"
Gorpuzkingz trap taldeak Mintza eta Blagan Egunean joko du, arratsaldez.
Mintza eta Blagan Eguna ospatuko dute larunbatean Hondarribiko Arrantzale Auzoan, goiz eta arratsaldez. Euskal Herriko mintzalagunen urteroko jaia egingo dute aurten Hondarribian eta Blagan Euskara Elkartearen bigarren festarekin batera ari dira antolatzen. Erabilera handitzea da bai Euskaltzaleon Topagunearen, baita Blaganen aldarri nagusiena, eta hori nahi du izan larunbatekoak, euskararen erabileraren aldarrikapen handi bat.
Hori da arrazoi nagusia Arrantzale Auzora hurbiltzeko, baina ez bakarra. Gehiago daude, horietako bat euskal traparen aitzindariak zuzenean ikusteko aukera izango dela.
Zakil Onil Gorpuzkingz taldeko frontmana oso kritiko azaldu da Hondarribiko kaleetan euskara gutxi entzuten delako, eta larunbatekoa garrantzitsua izango dela uste du: “Gaur egun Hondarribian trendya ez den bertako hizkuntza aldarrikatzeko egun garrantzitsu bat izango da”.
Lizunak, probokatzaileak, lotsagabeak… dira Gorpuzkingz. Horregatik ez da harritzekoa haien zale kopurua egunetik egunera handitzea, baita etsaiena ere. Denbora gutxian ospetsuak izatera iritsi da Hondarribiko hirukotea, baina haien musika ez da publiko guztietara iristen. Hori berdin zaiela argi utzi du abeslariak. “Hondarribiko biztanle gehienen ezagutza kulturala eta musikala titibilitira eta Paquito Chocolaterora murrizten da. Horregatik ez zaigu inporta ezagutzen gaituzten ala ez, edo zer espero duten”.
Zaleek gozatuko dute haiekin, eta ezagutzen ez dituztenak ahozabalik utziko dituzte, hori seguru. Kanpotik etorriko eta herri bazkariko txartelik gabe geratu direnei, mezu bat luzatu die Zakil Onilek: “Tuperak eta edariak etxetik ekarri, herri hau oso garestia da eta”.
Arratsaldean igoko da Gorpuzkingz taldea Arrantzale Auzoko oholtzara, 19:30ean. Ondoren, Hondarribiko Elektropatxarangak itxiko du Mintza eta Blagan Eguneko egitaraua.
Ikusi egitaraua
HITZAri elkarrizketa eskaini ziotenean
Irakurri Gorpuzkingz taldeari urtarrilean eginiko elkarrizketa
Erlazionatutako edukiaMintzatu eta blagan egin, biak batera
