Nagusien ohorezko asteburua biribildu dute gazteek
Futboleko gazteen lehen taldea Ohorezko Mailara igo da. Eibar Ohorezko Mailatik Euskal ligara igo izanak bidea erraztu die.
Hondarribia Futbol Elkarteko gazteen lehen taldeak Ohorezko Mailan jokatuko du heldu den denboraldian. 2016an jaitsi ziren mailaz hondarribiarrak, eta bi urte behar izan dituzte Gipuzkoako Maila gorenera itzultzeko. Larunbatean igoera kanporaketa hasi zuten Allerruren kontra, eta itzuliko partida irabazi zuten, baina Eibar Euskal ligara igo izanak bidea erraztu die, eta bi taldeak igo dira Ohorezko Mailara.
Igoera fasea ez zuten ondo hasi hondarribiarrek; lehen itzulia laugarren bukatu zuten, bidean puntu gehiegi utzita. Baina bigarren itzuli bikaina egin dute, bederatzi partidetan zortzi garaipen eta berdinketa bat lortuz. Nolanahi ere, ezin izan zuten zuzeneko igoera bermatzen duen lehen bi postuetan bukatu, eta hirugarren onenaren kanporaketa jokatu behar izan dute.
Larunbatean jokatu zuten joanekoa, Lezon, eta Hondarribiak 1-3 irabazi zuen. Egun berean jakin zen Eibar igoko zela Euskal Ligara, eta horrek bidea ematen zien biei, bai Hondarribiari, baita Allerruri, Ohorezko Mailara igotzeko. Gipuzkoako Federazioak gaur goizean klubei jakinarazi dienez, kanporaketa bueltako partidarik ez dute jokatu beharko.
Gazte Mailako taldeak, horrela, ohorezko asteburua biribildu du. Nagusien taldeak eman zuen lehen albiste ona, Aretxabaletaren aurka irabazi eta mailari eutsita. 2018-2019 denboraldian Ohorezko Mailan jokatuko dute berdeek, eta gauza bera egingo dute harrobiko nagusiek. Gizonen lau mailetan, liga nagusian jokatuko du Hondarribia Futbol Elkarteak, senior, gazte, kadete eta haurretan.
Eibar Euskal Ligara igo izanak bidea azkartu dio Hondarribiari
Erlazionatutako edukiaOhorezko Mailari eutsi dio Hondarribia FE-k
