Ohorezko Mailari eutsi dio Hondarribia FE-k

Aretxabaletari 1-0 irabazi diote berdeek eta Urola jaitsi da Preferentera.

Asier Perez-Karkamo

2018/05/26

Hondarribiarrak, garaipenaren gola zaleekin ospatzen

Majo sufrituta, baina Ohorezko Mailan jarraituko du Hondarribia Futbol Elkarteak. Aretxabaletari 1-0 irabazi diote gaur arratsaldean Hondartzan, eta, horri esker, Urolaren aurretik bukatu du denboraldia. Berdinketak ere balio zien berdeei, eta emaitza horrekin bukatu da oso parekatua izan den lehen zatia (0-0). Bigarrenean, hiru puntuen bila atera dira etxekoak, klubaren deialdiari erantzun dioten zaleen laguntzaz. Gaur bai, oso itxura ona zeukan Hondartzako harmailak. Bigarren zatian iritsi da Hondarribia FE-ren gola (Xabi, 57 minutuan), jokalariek eta zaleak liga irabazi izan balute bezala ospatu dutena. Ez da gutxiagorako, azken bost partidetan beste horrenbeste porrot pilatuta baitzituen taldeak eta gaur, emaitza hori errepikatuz gero, Preferentera jaitsiko litzatekeelako. Partida amaitzeko 20 minutu falta zirela epaileak Udako bi jokalari kanporatu ditu eta, hortik aurrera, emaitza zaintzen saiatu da Hondarribia, zelaian ondo kokatuta. Aretxabaletarrak berdinketaren bila joan dira, baina ez dute aparteko arriskurik sortu, berdeen defentsako lanak eragotzi dielako. Azkenean, mailari eutsi dio Hondarribiak. Luze egin zaio denboraldia, baina festa handi batekin bukatu da. Merezitako oporraldia hartuko du orain taldeak. Espero dezagun datorren urtean hainbeste sufritu behar izatea.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.