Ikasbasketeko neska gazteek gertu izan dute txapela
Carnicas San Marcial Hondarribia saskibaloi taldeak lau puntugatik galdu zuen Gipuzkoako finala, baina denboraldi bikaina itxi du.
Gutxigatik, baina ezin. Carnicas San Marcial Hondarribia saskibaloi taldeak Gipuzkoako Gazte Mailako finala galdu zuen igandean Donostiako Gasca kiroldegian. Easo Zelaia indartsua zuten aurrean eta, partida oso parekatua izan zen arren, hiriburuko taldearentzat izan zen garaipena (55-59).
Finala galdu arren, denboraldia bikaina izan da Ikasbasketeko gazteentzat, lehen fasean ere lauko finalera sailkatu baitziren, Euskal Ligara sailkatzeko urrats batera geratuz. Gainera, nesketako batzuek tarteka lehen taldearen deia jaso izan dute, seniorrekin entrenatzeko.
Gazteek ozta-ozta lortu ez duten arren, 2018-2019 denboraldia lehena izango da Hondarribiko harrobia Euskal Ligan lehiatzen dena, Kadete Mailako nesken lehen taldeak lortu zuelako sailkapena.
Harrobirako sortua
2015ean nagusien taldea sortu zuenean, harrobiari jarraipena emateko xedez egin zutela adierazi zuten Ikasbasket klubeko arduradunek. Seniorren ibilbidea sekulakoa izan da, hiru urtean Lehen Mailaraino iritsi baitira, eta bertan igoera fasea jokatu dutelako aurten. Baina beheko taldeen bilakaera ere ez da makala izaten ari. Neska gazteak eta kadeteak dira aurten gehien nabarmendu direnak, baina txikiagoak ere urtetik urtera hazten ari dira.
Mutilak ere oso ondo ari dira lanean. Aurten, mutilen Kadete Mailako lehen taldea igoko da Errendimendura. Eta hori baino inportanteagoa, dagoeneko mutilen lau talde lehiatu dira Gipuzkoako ligan, bi kadeteetan, beste bat Haurren Mailan, eta laugarren bat minibasketen. Dagoeneko ahaztuta dago Ikasbasket emakume saskibaloi kluba zeneko garaia.
Dudarik gabe, aurreko esperientzietatik ikasi eta etxea zimenduetatik eraikitzen ari da Ikasbasket, eta Hondarribiko saskibaloi proiektua geroz eta sendoagoa bilakatzen ari da urtetik urtera.
Carnicas San Marcial Hondarribia taldeko neskak, azpitxapeldunaren koparekin
