Minbiziaren kontra bazkalduko dute larunbatean
Gipuzkoako Minbiziaren Aurkako Elkartea izango da Klink elkartearen hurrengo bazkari solidarioaren onuraduna.
Hondarribiko Klink Elkarteak beste bazkari solidario bat antolatu du larunbat honetarako, hilaren 21erako. Oraingoan Gipuzkoako Minbiziaren Aurkako Elkartea izango da onuraduna. Klinkek jakinarazi duenez, txartelak ondo ari dira saltzen, baina oraindik bada izena emateko aukera. Ohiko lekuetan eros daitezke, 20 euroan: Alzaga urdaitegian, Kai Alde gozodendan, Batzokian, Done Pedro Kofradiaren dendan, eta Klink elkartean bertan.
Joaterik ez baina lagundu nahi duenak, Klinken kontu solidarioan egin ditzake ekarpenak. Honakoa da: ES05 2095 5039 90 1061338918. Bazkarian nahiz kontu korrontean bildutako diru guztia minbiziaren kontrako elkarteari bideratuko zaio.
Aurreko bazkari solidarioa martxoaren 24an egin zuten. Egun hartan, 5.313 euro lortu zituzten Hondarribia-Katsikas Boluntario Taldearentzat. Siria iparraldeko kanpalekuetan babesten diren kurduentzako bilketa izan zen, botikak erosi baitzituzten diru horrekin.
Hondarribia-Katsikasen aldeko martxoko bazkarian 5.313 euro lortu zituzten
