Berdinketen errege dela erakutsi du Il Capo Hondarribiak

Zazpigarrenez berdindu du lehen fasea laugarren bukatzeko. Igoera fasea Arrasaten jokatuko dute hondarribiarrek.

Asier Perez-Karkamo

2018/04/16

Bigarren itzulian partidarik galdu ez duen talde bakarra izan da Il Capo Hondarribia

Denboraldiko zazpigarren berdinketa lortu du Il Capo Hondarribiak Zarautzen (22-22), eta Euskal Liga laugarren tokian bukatu du (sailkapena). Abenduaren 16tik partida bakar bat ere ez dute galdu Javi de la Hazaren mutilek. Hain zuzen ere, Txikipolitekin galdu zuten azken partida, lehen itzuliko azken jardunaldian. Bigarren itzuli zoragarriari esker —zortzi garaipen, bost berdinketa eta porrotik ez—, igoera play-offerako sailkatu da Hondarribiko taldea. Hurrengo asteburuan jokatuko da igoerarako aurre-fasea —2.enetik 5.era sailkatu direnek jokatuko dute—, bigarren geratu den Arrasateren zelaian. Azken jardunaldian erabaki da kanporaketaren egoitza, Txikipoliten eta Il Caporen arteko berdinketa baliatu baitu Arrasatek Txikipolit aurreratzeko. Zarauzko taldea hirugarren geratu da, eta Il Caporen kontra jokatu beharko du berriro, larunbatean, play-offeko lehen partidan. Etxeko taldeak, aldiz, laugarren Aloña Mendi izango du aurkari. Irabazleek igandean jokatuko dute finala, Iturripen. Lauretatik lehenak bakarrik egingo du aurrera, eta Espainiako Lehen Mailara igotzeko azken kanporaketa jokatuko du, Euskal Ligako txapeldun Basauri Indupimerekin batera. Maiatzaren bigarren asteburuan jokatuko dira Lehen Mailara igotzeko eremuetako kanporaketak.

Asteburuko kirol emaitzak

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.