Garai bateko elkarlanari gorazarre

Elkarrekin-Together dokumentala proiektatuko dute ostegunean Hondarribiko Kultur Etxean.

Asier Perez-Karkamo

2018/04/10

Garai bateko euskal baleazaleen eta bertakoen arteko lankidetza ote zen argitu nahi du dokumentalak

Ostegunean Elkarrekin-Together dokumentala proiektatuko dute Alde Zaharreko Kultur Etxean (Denda kalea, 18), doan. Migueltxo Molinak, Pablo Iraburuk eta Igor Otxoak zuzenduriko filma da, eta hiruei Angel Oiarbide batu zitzaien gidoia osatzeko. 19:00etan hasiko da emanaldia eta proiekzioaren ondoren, laukoteko kide batekin solasaldia egongo da. Dokumentalak euskal arkeologoen espedizio batek AEBko ekialdeko irla huts batera eginiko bidaia kontatzen du. Aspaldiko agirien arabera, euskal baleazaleen eta bertakoen arteko lankidetzarako elkargunea izan zen irla hura. Elkarlan horien aztarrenen bila joan ziren euskal arkeologoak, bidai zirraragarri batean: “Espedizioko kideekin batera joango gara, lanbro artean, zuhaitz eta harri-labirinto batean barrena. Haien ametsa aurkitzen badute, erakutsiko dute beste mundu bat posible izan zela; beste mundu bat posible dela”, azaldu du Hondarribiko Udalak. Donostiako Zinemaldian aurkeztu zuten iaz Elkarrekin-Together, eta Euskal Herriko nahiz kanpoko hainbat hiri eta herritan estreinatu da. 90 emanaldi baino gehiago pilatu ditu dagoeneko, besteak beste, AEBko Boise, San Diego, Reno eta San Franciscon, Buenos Airesen eta Montevideon.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.