'A tempo' hasi da Kultur Etxean
Hondarribiko Musika eta Dantza Eskolak egitarau potoloa prestatu du aste honetarako. Kultur Etxeko hainbat txokotara zabalduko dira ekitaldiak.
23 ekitaldi jasoko ditu ‘A tempo’ kultur asteak
Ikusi egitaraua
Aste honetan ez da klaserik izango musika eskolan, baina ez dute formazioa alboratuko. Hala, gaur bertan, Igor Carvallo luthierraren bi formazio saio izango dira, eskolako ikasleek eta nahi dutenek musika tresnak egoki mantentzen ikasi dezaten. Gainera, asteazkenerako musika goiztiarreko saio berezia prestatu dute, eta egun berean, 4-6 urte bitarteko ikasleentzako Zatoz dantzara tailer berezia. Musika eskolak urtero antolatzen ditu ikasleen entzunaldiak, baina iaz eskolaren ardura hartu zuen lan talde berria zerbait desberdina antolatzen saiatu da, emanaldien espazioetatik hasita. Izan ere, Kultur Etxeko areto nagusia ez da emanaldietarako aukeratu duten gune bakarra. Horrez gain, eskolako atarian, dantza gelan, eta eraikineko beste zenbait aretotan banatu dute egitaraua. Asteak irauten duen bitartean, bertaratzen direnen iritzia eskatuko du musika eskolak. “Eskolako atarian guztiek erabiltzeko moduko liburu bat egongo da zeuen bizipenak jasotzeko eta hobetzen lagundu diezagukeen guztia proposatzeko”. Kartela, Santi Noainena Santi Noain arkitektu, artista eta musikariak —Naica taldeko bateria da— egin du A tempo kultur asteko kartela. Betikoa ez egiten saiatu dela azaldu du Noainek: “Musika garaikidearen idazkeran oinarritu naiz, zehazki musikagile frantses batek idatzitako partitura batean. Ahaleginak egin ditut betikoa ez egiteko, lan abstraktuagoa da honakoa. Sarritan pentsatzen dugu sinplea eta arrunta dela haurren mundua, baina nik konfiantza osoa dut gure haurrengan eta gazteengan, eta nahiago izan dut gazte horiek sintesirako eta abstrakziorako gaitasun handiko izakitzat hartzea”.
