Biznaga eta beste hiru, Psilocybeneako astebururako

Gaur, Biznaga punk talde madrildarrak joko du Hondarribian, Kaskezurrekin batera. Bihar stoner eta rock doinuak entzungo dira, Rukula eta TRT taldeekin.

Asier Perez-Karkamo

Hondarribia

2018/02/23

Biznaga punk talde madrildarra

Biznaga madrildarren punk ilunak astinduko du gaur Hondarribiko Psilocybenea aretoa. Iaz Sentido del espectáculo argitaratu zuten eta izandako arrakastak Ameriketan biratzeko aukera eman zien. Powerpopera hurbiltzen dira zenbait abestietan, baina begiak itxiz gero, 1980. hamarkadako Ezkerraldera bidaiatzeko aukera izango duzu. Betiko punk doinuak maite badituzu, zoaz azkar larruzko jakaren bila, gaurkoak gau handia izateko osagarri guztiak ditu-eta. Ateak 21:00etan irekiko dituzte, eta 22:00etan hasiko da zuzeneko musika. Aurretik sarrera erosi ez baduzu, 13 euro ordaindu beharko dituzu. Mereziko dizu. Kaskezur talde baztandarrak irekiko du jaialdia. Pop taldea da Kaskezur, baina iaz argitaratutako Azpisugeak diskoan power-popera eta rock psikodelikora gerturatzen dira tarteka, eta ondo moldatzen dira estilo horietan balantzaka. Bihar, Rukula eta TRT Bihar, Rukula eta The Riff Truckers taldeek okupatuko dute Psilocybeneako oholtza. Sarrerak 6 euro balio du eta ordu berean hasiko da gaualdia, 22:00etan. Rukula, azken urteetan Gipuzkoan sortu den talde interesgarrienetakoa da, euskal stoner rock panorama berritzeko asmoz datozenak. Usurbil eta Lasarte arteko laukotea da, instrumentala, baina funk eta rock zikina nahasten arrakasta lortzen ari dira. Taldearen izen bereko estudioko lanak zuzenean zein forma hartzen duen ikusteko aukera izango da bihar Psilocybenean. Aurretik The Riff Truckers taldeko eatarren ardura izango da giroa berotzea, eta hori haientzat ez da zaila izango, oso ongi mugitzen baitira southern ukituko blues rock giroan. Barran whiskya dagoen bitartean, TRTekin dibertsioa ziurtatuta dago.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.