Hondarribia baino gehiago izan da Eibar

Erregionaleko taldeak porrot batekin hasi du igoera fasea. Eibar nagusi izan da baina hondarribiarrek bajak nabaritu dituzte.

Asier Perez-Karkamo

Hondarribia

2018/01/15

Euria izan zen igoera faseko lehen partidako protagonista

Porrot batekin hasi du Hondarribia Futbol Elkarteak Euskal Ligarako igoera fasea. Eibarren kontra galdu zuten Ainhoa Iñarraren neskek (0-2), atzo arratsaldean Hondartzako belar artifizialeko zelaian jokatutako partidan. Euria izan zen protagonista, bota eta bota aritu baitzen partida hasieratik bukaeraraino, eta putzu handiak sortu ziren zelaian, baloiaren kontrola zailduz. Hondarribiak hutsune garrantzitsu batzuk zituen eta nabaritu zen, batez ere zelai erdian, eta lehen unetik Eibar egin zen baloiaren jabe. Lehen zatian aukera garbi batzuk izan zituzten armaginek aurretik jartzeko, baina ez zuten asmatu, eta hasierako husnakoarekin joan ziren bi taldeak aldageletara. Bigarren zatian, baina, Hondarribiak ezin izan zion Eibarren astinduari eutsi, eta bi gol jaso zituen. Hondarribiarren entrenatzaileak onartu zuen Eibar nagusi izan zela: “Teknikoki ekipo ona direla erakutsi dute, ez digute jokatzen utzi, eta ahal izan duguna egin dugu baloi guztiak borrokatuz. Eguraldiak ere ez digu lagundu, baina eguraldia bi taldeentzat izan da txarra, beraientzat ere”. Hurrengo jardunaldian kanpoan jokatuko dute hondarribiarrek, Anaitasunaren zelaian. Sailkatze ligaxka Eibarrekin berdinduta bukatu zuten azkoitiarrek, eta igoera fasea Bergaran irabaziz hasi dute. Partida zaila izango dute, hortaz, Hondarribiko neskek.

Hondarribiko kirol emaitzak

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.