Futbola itzuliko da asteburuan, saskibaloia eta eskubaloia oraindik ez
Senior Mailan, futboleko bi taldeek jokatuko dute asteburuan. Saskibaloikoak eta eskubaloikoek astebetez luzatuko dute oporraldia.
Eguberrietako geldialdia eta gero, lehiara itzuliko dira Hondarribiko kirol taldeak, batzuk behintzat. Nagusiei dagokienez, futboleko bi taldeek jokatuko dute asteburuan, Ohorezko Mailako mutilek eta Erregionaleko neskek. Saskibaloiko eta eskubaloiko taldeek, aldiz, beste astebetez izango dute atseden.
Futboleko maila guztietan bukatu dira oporrak. Ohorezko Mailako taldeak etxean jokatuko du larunbatean, Mutrikuren aurka, eta ezin du hutsik egin lehen itzulia jaitsierako postuetan bukatu nahi ez badu. Sailkapenean hamaikagarrenak dira mutrikuarrak baina bigarren talde golegile onena da, Ordizia liderraren ondoren. Hortaz, partida irabazteko, aurrena defentsako lana bereziki landu beharko du Hondarribiak. Adi ordutegiari, goizeko 11:00etan izango baita partida.
Erregionaleko neskek ligaxkako azken partida jokatuko dute, liderraren kontra. Bigarren postua poltsikoan dute eta, hortaz, bigarren fasea prestatzeko partida izango da, eta sailkapena lortu izana ospatzekoa. Aurkaria Beti Gazte izanda, txapelketa fasean taldeak eman dezakeen maila antzemateko balio dezake norgehiagokak. Etxean jokatuko du Erregionaleko taldeak, igandean, 16:00etan.
Gainontzeko mailetako taldeei dagokionez, Gazte Mailako lehen taldeak igoera fasea hasiko du asteburuan. Lehen partida Donostian jokatuko dute, Santo Tomas Lizeoaren kontra. Liga 3. multzoan jokatu du Santo Tomasek, eta bigarren bukatu du.
Ikasbasket, bigarren faseari begira
Saskibaloian, Ikasbasketek beste astebetez luzatuko du Eguberrietako oporraldia. Hurrengo asteburuan itzuliko da lehia Lehen Mailara, eta Arri BKLren kontra jokatuko dute hondarribiarrek, bigarren fasea buruan. Aurkaria multzoko talde ahulena izanik, minutuak jokalari guztien artean banatzeko aukera izan dezake taldeak.
Asteburu honetan Gazte Mailako taldeek jokatuko dute bakarrik, Errendimendu Mailakoa eta Partaidetzakoa.
Eskubaloikoek ere, atseden
Eskubaloian, Euskal Ligan ez dago jardunaldirik, hilaren 13an hasiko da bigarren itzulia, eta Il Capo Hondarribiak aurkari zuzen baten kontra jokatuko du, Amazsa Urdanetaren kontra. Egun horretan zazpigarren postua izango dute jokoan baina, taldearen bilakaera ikusita, Hondarribia Eskubaloiak gorago begiratu nahiko du, liga lehen bosten artean behintzat bukatzeko gaitasuna duelako.
Bigarren taldeak ere hurrengo asteburuan jokatuko du, Ordizia Amonanerekin. Gipuzkoako 2. Mailako sailkapenaren erdialdean daude bi taldeak eta, irabaziz gero, atzeko postuetatik urrunduko dira hondarribiarrak.
Erregionaleko neskek Beti Gazte liderraren kontra bukatuko dute ligaxka
Hondarribiko kirol agenda
