Miren Aierbek Arma Plazako koordinatzaile postuan jarraituko du, fundazioaren estatutuetan postu hori konkurtsora atera behar dela azaltzen bada ere.
EAJk fundazioan dituen patronoak, goizeko agerraldian
Atzo oposizioko lau taldeek Arma Plaza Fundazioa uztea erabaki dutela jakinarazi eta gero, udal gobernuaren erantzuna iritsi da gaur. Fundazioko patronatuko kide diren sei ordezkari jeltzaleek (ezkerretik hasita, Gotzone Larrarte, Kalixa Silanes, Maria Serrano, Txomin Sagarzazu alkatea eta fundazioko presidentea, Juan Mari Altuna, eta Arantxa Berrotaran) agerraldia egin dute goizean Arma Plaza eraikineko goiko solairuan, fundazioaren baliagarritasuna defendatzeko eta Miren Aierbe kudeatzailea babesteko. Txomin Sagarzazu alkate eta fundazioko presidentea luze mintzatu da haien izenean, eta erakundearen alde negatiboa soilik kontuan hartzea leporatu die oposizioko taldeei. Gaur, fundazioaren onurez jardun du alkateak. “Ahalmen handiak ditu, balio du, eta herriari ekarpena egiten dio”, ziurtatu du.
Fundazioak norabide berria behar duela, eta horretarako, estatutuetan azaltzen den bezala Aierberen postua konkurtsora atera behar dela esan zuten atzo Abotsanitz, EH Bildu, PSE-EE eta PP udal taldeetako bozeramaileek. Haien eskaera bikoitzari erantzuna eman die Sagarzazuk. Batetik, koordinatzaileak ez duela norabidea finkatzen adierazi du, “patronoen esku dago, ez da koordinatzailearen egitea”. Eta bestetik, Aierberengan konfiantza osoa dutela berretsi du alkateak: “Jokabide profesionala aztertu eta baloratu eta gero, ez dugu arrazoirik ikusten kargutik kentzeko”.
Bere hizketaldian, Arma Plaza Fundazioaren onurak zerrendatu ditu Sagarzazuk, erreferente bilakatu izana, hiritarrekiko lotura lortu izana, bisita gidatuen programan ondare ikuspegia txertatu izana, edota Arma Plazako informazio guneak jasotako bisitari kopurua goraipatu ditu, “hiru hiriburuen ondoren EAEko turismo zentrorik bisitatuena da”. Eta beste lorpen batzuk gehiago gaineratu ditu. Horietako batzuk udaleko kultura edo turismo departamentuen ardura izan arren, Sagarzazuren hitzetan, fundazioak ez dio udalari konpetentziarik egiten, “osagarriak dira, batak ez du bestea ordezkatzen”.
Autokritikarik ez
Hobetzekoen artean gutxiago, eta hobetzekoak bai, baina akatsik ez du onartu. Esaterako, bere hizketaldian ez ditu aipatu ere egin Unescoren Hiri-Sortzaile izendatzeko hautagaitzaren hutsegitea, ezta
Mariñel istripuaren ondorengo kudeaketa ere, oposizioak erakundea uztea eragin duena.
Ondoren, kazetarien galderei erantzunez, istripuaren inguruan gertatutakoaren informazioa patronoei eskaini zaiela baieztatu du alkateak, “Abotsanitzek eta guk istripuaren inguruan gertatutakoan informazio bera dugu”. Gertatutakoaren kudeaketaz, udal langileek “irizpide profesionalarekin” aritu direla gehitu du, eta fundazioa, “zorroztasunez eta hildakoarekin eta familiarekin errespetuz”.
Oposizioari erantzun dio gaur EAJk, atzo egindako eskaerei ezezkoarekin erantzunez. “Guk segituko dugu —esan du Sagarzazu erakundeko presidenteak—, estatutuek esaten duten bezala lanean”. Eta koordinatzaile gisa jarraituko du Aierbek, fundazioko estatutuetan koordinatzaile kargua konkurtso publiko bidez aukeratu behar dela zehazten den arren.
