Ion Areitio Txinara, bike-trialeko munduko txapelketara
Chengdu hirian egingo da bike-trialeko txapelketa nagusia, datorren astean, hiri-txirrindularitzako munduko txapelketen barruan.
Ion Areitio bike-trial pilotu hondarribiarrak Txinara bidaiatuko du bihar, hilaren 8tik 12ra Chengdu hirian egingo den hiri-txirrindularitzako munduko txapelketetara (2017 UCI Urban Cycling World Championships). Iaz Val di Solen (Italia) lehen aldiz podiora igo zen Areitio eta, aurten Munduko Kopan hain ondo ibili ez den arren, ohorezko postuetarako hautagaietako bat izango da Monty Teameko txirrindularia.
Berritasun ugariko txapelketa izango da Chengdukoa, lehen aldiz XCE —cross countrya eta four-cross jaitsiera uztartzen dituen kirola—, BMX freestyle park, eta bike-trial modalitateak txapelketa berean bildu baitituzte (ikusi beheko bideoa).
Trialaren kasuan aldaketa handia da, orain arte munduko txapelketa mendiko txapelketekin (cross country, jaitsiera eta four cross) batera burutzen zelako, hau da, mendi eremuan. Iaz, esaterako, Alpetan jokatu zen bike-trialeko txapelketa nagusia.
Ezkerretik, Benito Ros nafarra Abel Mustieles eta Areitio, Val di Soleko podioan
