Bihar hasiko dituzte Izuaren Etxeko prestaketak

Errezeta izugarriak, makillaje tailerrak, beldurrezko proiekzioa eta, batez ere, Izuaren Etxea prestatu, hori da urrirako Sainduan duten plana.

Asier Perez-Karkamo

Hondarribia

2017/10/03

Iazko Izuaren Etxerako mozorrotu ziren gazteak. Aste honetan hasiko dira aurtengo Gau Beltza prestatzen

Hondarribiko Saindua Udal Gaztelekuan urduri jartzen hasiak dira, udazkeneko ekintza ikusgarriena prestatzeari ekingo baitiote aste honetan. Hilaren 31n gaztelekua Izuaren Etxea bilakatuko da, eta horri begira hainbat tailer antolatu dituzte. Urriko lau asteazkenetan (hilak 4, 11, 18 eta 25), beldurrezko errezetak prestatzen ikasiko dute, eta ostegunetan (5, 12, 19 eta 26) Gau Beltzean egingo duten ekintza prestatuko dute, gaia zehaztu, gidoia idatzi, mozorroak aukeratu, baserria prestatu… Zortzi tailer horiek ordu berean egingo dituzte, 17:30etik aurrera. Oraindik ez dute zehaztu zein gai aukeratuko duten aurtengo Izuaren Etxerako (iaz REC filma landu zuten), hori aste honetan aztertuko dute. Hartzen duten erabakiaren arabera, hileko azken bi ostiraletan makillaje tailerrak egingo dituzte, Gau Beltzeko mozorroak are eta beldurgarriagoak izan daitezen. Gainera, hilaren 21ean (larunbata) beldurrezko proiekzioa izango dute Sainduan. Hori ere Izuaren Etxeari begira egiten dute, aukeratutako gaiari lotutako filma proiektatzen dute gazteek, mozorroak hobetzeko, karakterizazioak sinesgarriagoak izateko, eta abar. HITZAk jakin izan duenez, mutilek ere parte hartzea izango da aurtengo Izuaren Etxeko erronketako bat. Nonbait, neskak baino beldurtiagoak dira Hondarribiko mutilak, eta azken urteetan oso mutil gutxi ausartu da ekintzan parte hartzera.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.