Hondarribia Futbol Elkarteko Ohorezko Mailako taldeak denboraldiko lehen garaipena lortu zuen larunbatean, Real Unionen kontrako derbian.
Denboraldiko lehen derbia hondarribiarrentzat izan da
Hondarribia FE-ko lehen taldeak denboraldiko aurreneko garaipena eskuratu zuen larunbatean Hondartza futbol zelaian (3-1), Real Unionen kontra jokatutako bidasoarren arteko derbian. Etxekoek denbora gehiagoz izan zuten baloia, eta aukera garbienak beraiek sortu zituzten.
Lehen gola Calerok lortu zuen, partida hasi eta gutxira. Baina atsedenaldiaren aurretik irundarrek berdinketa ezarri zuten, hondarribiarren defentsak gaizki urrundutako baloi bat aprobetxatuz. Bigarren zatian garaipenaren bila irten zen Hondarribia, eta bitan zulatu zuen Unionen atea; Madurga eta Goikoetxea izan ziren golegileak.
Garaipenari esker, multzoko azken tokietatik atera da taldea, eta 11. tokian jarri da, hain zuzen ere, irundarrekin puntuan berdinduta. Datorren larunbatean Donostian jokatuko dute berdeek, Vasconiaren zelaian. Orain arte puntu bakarra lortu dute donostiarrek, bigarren jardunaldian Hondarribia menderatu zuen Hernaniren kontra lortutakoa.